Վեց “մահացու” սխալներ

Պատկերացրեք ձեր տունը, մտերմիկ երեկո ընկերների շրջապատում և Դուք գինի եք մատուցում: Այսօր որոշեցինք խոսել այն սխալների մասին, որոնք մարդիկ հաճախ թույլ են տալիս գինին մատուցելիս, ինչպես նաև կխոսենք այն կանոնների մասին, որոնց հետևելը կազատի նման “ճակատագրական սխալներ” գործելու վտանգից :)

Գինին պետք է որակյալ լինի

Այսօր խանութներում ամենատարբեր գնի գինիներ է կարելի գտնել` մի քանի հարյուր դրամից մինչև տասնյակ և նույնիսկ հարյուր հազարներ: Կողմնորոշվելը դժվար է, սխալվելը` ավելի քան հեշտ, քանի որ նույնիսկ միջին գնային շարքում կա վատ գինի ձեռք բերելու վտանգը: Եվ այսպես, գինին գնելուց հարկ է ուշադրություն դարձնել շշի, խցանի և պիտակի վրա: Վերջինը պիտի ուղիղ և ամուր փակցված լինի, տպված լավ թղթի վրա, որակյալ ներկով: Այն նաև պիտի գինու մասին ամբողջական տեղեկություններ պարունակի: Եթե պիտակի վրա կարդում եք “օրիգինալ” կամ “գինու ըմպելիք”` ապա ամեն ինչ պարզ է, դա գինի չէ: Շշի ձևը պիտի մոտ լինի դասականին, քանի որ էժան կամ անորակ գինու արտադրողները ուշադրություն գրավելու համար հաճախ օգտագործում են աչքի ընկնող, արտասովոր ձևերի շշեր: Եվ ամենակարևորը` խցանն է: Այն ոչ մի դեպքում չպիտի պլաստմասե լինի: Առավել հեղինակավոր արտադրողները բնական հումքից պատրաստած խցանի վրա հաճախ իրենց ապրանքանշանն են տպում:

Գինին չպիտի ոչ շատ տաք լինի, ոչ շատ սառը

Յուրաքանչյուր գինու տեսակ ունի մատուցման ճշգրիտ ջերմաստիճան: Ծայրահեղությունները նույնչափ վատ են. չափից շատ գինին հովացնելը “կողպում” է գինու բույրը և համային առանձնահատկությունները, իսկ չափազանց տաք մատուցելու դեպքում գինում ցայտուն արտահայտվում են թերի կողմերը: Կանոնի համաձայն սպիտակ գինիներին առավելագույնս հարմար ջերմաստիճանը 8-12⁰C միջակայքն է, կարմիրներինը` 14-17⁰C: Թնդեցրած, ինպես նաև տտիպ գինիների ջերմասիճանը պիտի ավելի բարձր լինի: Հաճախ շշի հակառակ կողմում կարելի է կարդալ. “մատուցել սենյակային ջերմաստիճանի ներքո”: Մի հետաքրքիր փաստ նշենք: “Սենյակային ջերմաստիճան” որակավորումը գոյացել է միջնադարյան Ֆրանսիայում, որտեղ ամրոցներում կամ նույնիսկ տների սենյակների ջերմաստիճանը շատ էր տարբերվում մերօրյա ջեռուցվող կամ օդափոխվող սենյակների օդի ջերմաստիճանից: Եթե միջնադարյան Ֆրանսիայում սենյակում պահպանվող գինին 17-19 աստիճան էր լինում, ապա այսօր սենյակային ջերմաստիճանը կազմում է 20-22 աստիճան, այնպես որ նման պիտակով գինին ևս որոշակի հովացման կարիք ունի:

Գինին ցանկանում է շնչել

Գինին կենդանի է, միթե չէիք լսել դրա մասին: Սակայն արտադրության, պահպանման, հնացման ընթացքում այն երկար ժամանակ թթվածնի հետ շփվելու հնարավորություն չի ունենում: Այդ իսկ պատճառով շիշը բացելուց հետո ընդունված է թույլ տալ նրան մի քիչ “շնչել”: Մի գաղտնիք բացահայտենք` երեկույթի ավարտին շշում մնացած գինու վերջին գավաթը ամենահամեղն է լինում, քանի որ թթվածնի հետ չափավոր շփումը լավագույնս բացահայտում է գինու բույրը և փափկեցնում տտիպությունը:

Գինին համապատասխան գավաթ է պահանջում

Շատ կարևոր է, թե ինչ գավաթով եք մատուցում գինին: Տարբեր գինիների տեսակներին համապատասխանող գավաթների մասին կարող եք կարդալ այստեղ: Սակայն կարևոր է նաև, թե որքան գինի եք լցնում գավաթի մեջ: Ամենամեծ սխալը, որ կարելի է թույլ տալ այս պարագայում` բաժակը լեփ-լեցուն լցնելն է: Ասվածը կարող է չհամատասխանել հյուրընկալության Ձեր պատկերացումներին, սակայն այս կանոնը բացատրություն ունի` կիսով չափ կամ նույնիսկ ավելի քիչ լցված բաժակում գինին շնչում է, բացի այդ, հետևելով բաժակի պատերին մնացող հետքերին, կարելի է կարծիք կազմել գինու որակի և տարիքի մասին:

Գինին և ուտեստները

Գինու և ուտեստի կատարյալ զույգ կազմելը հեշտ գործ չէ և այս հարցում մասնագիտանալու համար բացի խորը գիտելիքներից նաև առանձնահատուկ ճաշակ և խոհարարական տաղանդ է հարկավոր: Սակայն մի հուսահատվեք, քանի որ եթե դա այդքան հեշտ լիներ, սոմելյեների դասընթացները այդքան թանկ գին չէին ունենա: Դեպքերի մեծամասնությունում բավական է խուսափել ակնհայտ ու կոպիտ սխալներից: Ոսկե կանոնի համաձայն` գինին չպիտի գերիշխի, այն ընդամենը պետք է նրբորեն շեշտի և բացահայտի ուտեստի համը: Ուտեստն ու գինին պետք է համապասխանեն իրար` ըստ համի ուժգնության ու հագեցվածության: Ճարպոտ, ծանր ուտեստները պահանջում են թնդացրած, հնացրած կարմիր գինի, իսկ ավելի թեթևները` ավելի երիտասարդ սպիտակ, կարմիր կամ վարդագույն գինի: Հակադրությունները ևս թույլատրելի են, բայց միայն երկխոսության, այլ ոչ թշնամության տեսքով: Գինին չի կարելի խմել, քանի դեռ ծամում եք ուտեստը` չէ որ դա սոուս չէ, սպասեք, մինչև բերանն ազատվի և միայն դրանից հետո համտեսեք գինին:

Գինին ցանկանում է հանգստանալ

Կարող է տարօրինակ թվալ, սակայն գինին նաև “դյուրագրգիռ” և “նյարդային” հեղուկ է, եթե կարելի է այդպես արտահայտվել: Ապացուցված է, որ որոշակի ժամանակի ընթացքում շարժման մեջ գտնվող շշում գինին “հոգնում” է: Այս երևույթի համար նույնիսկ տերմին գոյություն ունի` ճանապարհորդական շոկ: Մեխանիկական ազդեցությանը ենթարկված գինին հանգստանալու կարիք ունի, հակառակ դեպքում նրա համը անհետաքրքիր է դառնում և չի բացահայտվում նույնիսկ բոլոր մնացած կանոններին հետևելու դեպքում:

Փոքր մտավախություն ունենք` տպավորություն ստեղծվի, որ ավելի հեշտ է գինի չխմել, քան հետևել նշված ուղեցույցներին: Հավատացեք` գինու էտիկետի պահպանումը իրականում դժվար չէ, ավելին ասենք, դա ըմպելիքը լիարժեք կերպով վայելելու հիմքն է:

Փորձեք հետևել կանոններին, արդյունքում ձեռք կբերեք հյուրընկալ տանտիրոջ համբավ ու ամենապարզ ընթրիքը կվերածվի նշանակալի և հիշվող իրադարձության:

Մեկնաբանել

Ձեր էլ. փոստի հասցեն չի հրապարակվելու: Պարտադիր դաշտերը նշված են *-ով.

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>